O grupo municipal do PP no Concello de Vigo reprochou este luns ao alcalde da cidade, Abel Caballero, que non reclame ao Goberno central as actuacións de “verdadeiro calado” que necesita a urbe olívica, mentres mantén unha relación “epistolar” de esixencia con outras administracións e organismos.
Así o trasladou, en rolda de prensa, o portavoz do grupo ‘popular’, Alfonso Marnotes, quen advertiu de que Vigo debe saír “do reduto localista” en que a meteu o alcalde, e preocuparse de “tecer alianzas”, “negociar acordos” e buscar consensos con outras administracións e entidades.
En lugar diso, lamentou, a estratexia do alcalde se basee en “enviar cartas”, que poderían reunirse para unha obra titulada “Cartas desde a Torre”, segundo o PP, nunha “singular relación epistolar” da que “ninguén espera resposta”.
Con todo, apuntou Alfonso Marnotes, entre os destinatarios das misivas non está o Goberno central, a pesar de que gran parte das medidas e investimentos que, ao seu xuízo, necesita Vigo, dependen desta administración: a supresión da peaxe na AP-9 en Redondela, a conversión da autoestrada en viaria urbano desde Teis, o soterramento da VG-20 en Navia, a nova autovía Vigo-O Porriño, a saída sur ferroviaria e o AVE directo por Cerdedo, a declaración de interese xeral da mellora do abastecemento, ou a rexeneración do litoral, entre outros “temas de verdadeiro calado”.
Por iso, anunciou o portavoz do grupo municipal do PP, os ‘populares’ presentarán unha moción en pleno para instar o alcalde a reclamar estes investimentos.
