O alcalde de Vigo, Abel Caballero, acusou ao presidente da Xunta, Alberto Núñez Feijóo, de insultar os residentes desta cidade ao telo criticado durante a súa visita deste luns á cidade e lembroulle que o pasado 26 de maio obtivo o apoio do 67 por cento da cidadanía.

Preguntado este martes tras unha rolda de prensa en Vigo, Abel Caballero referiuse así á intervención de Feijóo durante o acto de toma de posesión de Corina Porro como delegada territorial da Xunta en Vigo e denunciou que o tachou de “totalitario”.

A este respecto, Caballero incidiu en que a cidade apoiou “masivamente” o seu proxecto nas eleccións municipais e volveu lamentar que o presidente do Executivo autonómico non “entendese” a mensaxe que lle enviaron os vigueses cando o seu partido pasou de contar con sete a catro concelleiros na corporación municipal.

Deste xeito, afirmou que Feijóo debe mostrar que cambiou a súa actitude cara á cidade dado que é quen toma as decisións “en contra” desta. Ademais, preguntouse como esperan os responsables do Goberno galego que os cidadáns de Vigo confíen neles tras atrasar a execución da conexión de alta velocidade a Madrid, entre outros proxectos.

Cuestionado por se se reunirá coa nova delegada territorial da Xunta, apuntou que, como rexedor olívico, só mantén encontros con conselleiros do Executivo galego ou co seu presidente.