Marino Giménez, irmán de Sinaí –coñecido como o ‘rei dos xitanos de Galicia’ e autoproclamado o “Obama galego”– que fora reclamado polo Xulgado do Penal número 1 de Pontevedra, foi detido este xoves en Vigo.

Segundo precisou a Policía Nacional, os feitos tiveron lugar ao redor das 2,00 horas na rúa Gregorio Espino, onde unha patrulla que circulaba pola zona detectou un monovolume.

Ao observar ao condutor, os axentes descubriron que se trataba deste home, polo que procederon á súa detención e traslado a dependencias policiais debido á requisitoria do xulgado que había sobre el, pasando a disposición do Xulgado de Instrución en funcións de garda.

En concreto, ordenouse a procura de Marino Giménez despois de que non asistise ao Xulgado do Penal número 1 de Pontevedra para comparecer por agresións perpetradas contra un avogado e gardas civís en Tui en abril de 2014.

Mentres, continúa a procura doutro dos irmáns de Sinaí, Juan Paulo Giménez, como presunto autor dun tiroteo perpetrado en Torneiros, no Porriño (Pontevedra), o pasado mes de maio.