InicioSociedadeAs navieiras farán menos viaxes a Cíes este verán

As navieiras farán menos viaxes a Cíes este verán

A Consellería de Medio Ambiente e Ordenación do Territorio e as sete navieiras autorizadas acordaron os horarios das viaxes para a temporada de verán, que serán menos que en 2017, cun total de 43.

PUBLICADO O

A Consellería de Medio Ambiente e Ordenación do Territorio e as sete navieiras autorizadas para facer o transporte marítimo regular ás Illas Cíes acordaron os horarios das viaxes para a temporada de verán, que serán un total de 43. O calendario xa foi remitido á Axencia de Modernización Tecnolóxica de Galicia para que active a aplicación de reservas por Internet.

Así o comunicou a Xunta, que coordinou as negociacións e indicou que o acordo se alcanzou “por unanimidade”. En concreto, as viaxes comezarán o 24 de xuño e prolongaranse até setembro, ao que se engaden as fins de semana e festivos de outubro.

A Administración explicou que un dos criterios que seguiu para a distribución de horarios foi o número de barcos por navieira que van realizar o transporte regular este verán, de forma que se asignou un máximo de catro horarios por cada barco de cada unha das navieras.

Ademais, este ano reducíronse as frecuencias horarias “por razón de seguridade”, en atención a un informe emitido a principios de marzo pola Capitanía Marítima no que se indicaba que o intervalo de tempo entre as saídas dos barcos “non debe ser inferior a 20 minutos”.

VISITANTES

A Xunta xa remitiu esta resolución ás navieiras, ás que lembrou que esta distribución de horarios “non inflúe no número de visitantes que poden acceder ás illas”, e tamén á Amtega, para que active a aplicación de reservas por Internet.

Este sistema de reservas, que permite que os visitantes obteñan unha autorización persoal e intrasferible, implantouse despois da polémica xurdida en agosto de 2017, cando o Parque Nacional denunciou a catro navieiras que conectan Vigo, Baiona e Cangas con Cíes, por supostamente trasladar ás illas durante dúas xornadas a máis persoas das permitidas.

Esta situación derivou en que a Xunta impuxo sancións por un total de 930.000 euros a catro navieiras, pola comisión de infraccións graves por “incumprir as cotas autorizadas” de visitantes. Ademais, a Fiscalía de Vigo abriu dilixencias de investigación, a instancias da Xunta, para dirimir se por isto houbo delitos de falsificación de documentos e estafa á cidadanía.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...