O novo grupo municipal do PP no Concello de Vigo reclamou este mércores unha “reforma” do regulamento do pleno e do funcionamento dos órganos representativos do consistorio porque, denunciou, estes órganos adoecen de “falta de democracia” e “non se respecta a pluralidade” da corporación.
Así o trasladou en rolda de prensa o portavoz do grupo, Alfonso Marnotes, quen advertiu de que as administracións públicas camiñan cara a “un novo tempo” político no que son “máis abertas”, transparentes, “respectan a pluralidade e os dereitos democráticos dos cidadáns e os seus representantes”, e fomentan a “participación”.
“O funcionamento do Concello de Vigo non responde a eses novos tempos”, resolveu, e apuntou que os regulamentos de parlamentos e concellos “van noutra dirección” distinta á que se segue na cidade olívica.
CAMBIOS NO REGULAMENTO
Por iso, o PP pediu unha reforma do regulamento e que se adopten medidas como, por exemplo, reservar as mocións de control dos plenos para os grupos da oposición. “É absurdo que o grupo de goberno presente mocións de control a si mesmo”, sentenciou.
Así mesmo, pediu que “se garanta a publicidade dos plenos en tempo real”, coa retransmisión en directo das sesións a través da web municipal ou das redes sociais; que se facilite aos grupos da oposición “os espazos e medios adecuados” para facer o seu labor; ou que se “flexibilicen” os tempos de intervención.
NOVO GRUPO
Alfonso Marnotes presentou este mércores formalmente aos tres concelleiros que o acompañarán no grupo municipal. Así, mentres el mesmo se encargará de fiscalizar as áreas de economía, emprego, urbanismo ou contratación, entre outras, Teresa Egerique (a única do catro representantes do PP que xa foi edil no anterior mandato) ocuparase de Fomento, Limpeza, Cultura, Educación ou Participación Cidadá.
Patricia López Román encargarase de Política Social, Mocidade, Igualdade, Comercio ou Turismo; mentres que o policía en excedencia Jesús Marco farao de Seguridade e Mobilidade, Deportes, ou Parques e Xardíns, entre outras.
Finalmente, e a preguntas dos medios sobre as críticas do PSOE pola composición do grupo municipal con edís que non estaban nos primeiros postos da lista, Alfonso Marnotes limitouse a lembrar que a configuración do grupo foi resultado da “reacción firme” do partido (que nomeou unha xestora, tras a dimisión de Elena Muñoz e o seu equipo) nunha “situación non desexada” e provocada polos “malos resultados” das eleccións do pasado 26 de maio.
