Máis de medio centenar de delegados da Confederación Intersindical Galega (CIG) manifestáronse este mércores en Vigo en defensa dun “emprego digno” no sector da automoción. A marcha comezou pasadas as 13,00 horas no parque tecnolóxico e loxístico de Valladares e percorreu a zona na que se sitúan as empresas Denso, Benteler e Lear, segundo recolleu o sindicato nun comunicado.

Durante a manifestación, que se alongou máis dunha hora, os sindicalistas repartiron folletos informativos nos que se detallaban as propostas da CIG ante a transformación dixital debida á aplicación das novas tecnoloxías.

Ademais, o sindicato propuxo alternativas para afrontar a crise dos motores diésel, motivada pola aprobación da Lei de Cambio Climático e Transición Enerxética. Esta mobilización súmase a unha serie de actuacións que leva a cabo o sindicato nas zonas de Vigo e Ourense co obxectivo de denunciar o desfalecemento do sector e a “precarización” laboral rexistrada no mesmo.