A Facultade de Ciencias Económicas e Empresariais da Universidade de Vigo (UVigo) converteuse, xunto á escola desta disciplina do País Vasco, na que conta cunha maior porcentaxe de mulleres investigadoras de España, un 48 por cento.

Segundo trasladou a universidade galega nun comunicado, as cifras extraéronse do estudo ‘Women in European Economics’ elaborado pola Asociación Europea de Economía sobre a presenza de mulleres investigadoras en centros de investigación económica e de empresa deste continente.

O informe tomou como mostra as 300 mellores institucións europeas que levan a cabo investigacións no ámbito económico de acordo co ranking elaborado por RePEc, que sitúa á facultade de Vigo no posto 232. En canto ao número de mulleres investigadoras, esta escola atópase entre as 20 que acumulan unha maior porcentaxe.

Así, constatouse que o número de mulleres investigadoras na facultade viguesa é superior ao da London School of Economics, no que supoñen o 24 por cento do total, a Universidade de Oxford, na que suman un 31 por cento; e a facultade de Economía da Universidade de Cambridge, na que este colectivo representa o 21 por cento.

MULLERES EN CENTROS DE INVESTIGACIÓN

O estudo comprobou que o peso das mulleres nos principais centros de investigación é menor que o dos homes e que o xénero feminino está menos representado nos postos máis altos. De feito, ningún dos centros máis prestixiosos alcanza unha porcentaxe do 33 por cento de mulleres sobre o total dos seus investigadores.

Tamén se atopan diferenzas por países. Así, só o 7 por cento dos centros estudados dos Países Baixos contan con polo menos un 40 por cento de investigadoras, unha cifra que non alcanzan ningún dos suízos incluídos no informe.

As institucións de Reino Unido analizadas na investigación nas que as mulleres supoñen polo menos o 40 por cento do persoal supoñen un 17 por cento, fronte ao 24 por cento que rexistra España e o 26 por cento que acumulan os centros franceses.