A Xunta de Galicia insistiu este mércores en que fixo “todo o posible” polo estaleiro vigués Vulcano, cuxa “prioridade” agora debe ser a entrega do ferri, e advertiu de que “a solución” para este estaleiro “ten que vir de parte da propiedade”. Así o trasladou, en declaracións aos medios, o conselleiro de Economía, Emprego e Industria, Francisco Conde, durante a súa participación nun almorzo con membros da Asociación de Novos Empresarios de Vigo.

Conde lembrou que a Administración autonómica apoiou ao estaleiro para que “puidese facer fronte á construción do ferri” e para “traballar nunha viabilidade futura”. “Desde a Xunta, a nosa prioridade nestes momentos é que se poida entregar o ferri, e póidanse cumprir os compromisos co armador e cos diferentes provedores”, sinalou o conselleiro.

A partir de aí, en relación ao futuro da empresa (cunha importante débeda e sen carga de traballo), Francisco Conde aseverou: “Estamos a disposición do estaleiro, pero a solución ten que vir por parte da propiedade”. Así, o titular de Economía do Goberno galego sinalou que “hai que saber cales son os plans que ten” a dirección de Vulcano, e advertiu de que “a carga de traballo é o elemento que define a viabilidade ou non dun estaleiro”.

Finalmente, e con respecto á posibilidade de que haxa algún investidor interesado en facerse coa empresa tras un proceso de liquidación, Francisco Conde indicou que a Xunta non ten “constancia dunha oferta concreta” ou de que haxa “conversacións que poidan albiscar unha solución de transmisión da propiedade”.