A candidatura de Cíes-Parque Illas Atlánticas a Patrimonio da Humanidade entra na súa “recta final” coa elaboración dun estudo técnico e científico do que se encargarán expertos das tres universidades galegas en colaboración coa Xunta.
Trátase, segundo concretou o presidente da Xunta, Alberto Núñez Feijóo, dun dos últimos pasos para a declaración do complexo insular galego como Patrimonio da Humanidade da Unesco, tendo en conta que a candidatura de Cíes-Illas Atlánticas xa figura na lista indicativa do Goberno español.
Transcorrido un ano desde que o Ministerio de Cultura dese o visto e prace á candidatura galega, o seguinte paso será que o Estado a inclúa na lista definitiva que proporá á Unesco no ano 2021. De facelo, segundo o presidente galego, Cíes-Illas Atlánticas estaría virtualmente dentro do Partimonio da Humanidade da Unesco, xa que “normalmente” as candidaturas dos países “reciben o visto e prace pola Unesco”.
Así as cousas, a Administración autonómica e as tres universides galegas –Santiago, A Coruña e Vigo– colaborarán na redacción do “formulario” técnico para que sexa “sólido na súa construción” e debe incluír “avaliacións metódicas feitas por expertos con criterio científico e rigor”.
