O alcalde de Vigo e candidato á reelección, o socialista Abel Caballero, xustificou este martes a súa ausencia dos debates electorais organizados por medios de comunicación ou outros colectivos, argumentando que el xa fala “directamente coa cidade”.
Sobre esa ausencia, que adoita suplir o concelleiro e candidato número 8 da súa lista, Carlos López Font, Abel Caballero proclamou: “O meu contacto é coa xente”.
Segundo afirmou, entre risas, “hai algúns que non son capaces de falar coa xente porque a xente non lles fai caso, e queren ver se estou eu para que os atendan”.
“Eu falo directamente coa cidade, eu falo directamente coa cidade, eu falo directamente coa cidade”, repetiu tres veces, ante as preguntas sobre os seus motivos para non acudir a eses debates.
