A Universidade de Vigo chegou a un acordo co Concello de Baiona (Pontevedra) e cos comerciantes e empresarios desta localidade para ofrecer aos seus estudantes e profesores aloxamento durante o curso nesta vila, a prezos alcanzables, e con servizo de bus directo entre Baiona e o campus universitario vigués.

A vicerreitora de Captación de Alumnado, Estudantes e Extensión Universitaria, Natalia Caparrini; o presidente da Asociación de Comerciantes e Empresarios de Baiona (Aceba), Marcos Comesaña; e o alcalde de Baiona, Anxo Rodal, presentaron este xoves esta iniciativa, que se plasmará nun convenio de colaboración entre as partes implicadas.

Segundo explicou Marcos Comesaña, este “campus residencial” en Baiona ofrece aloxamento aos estudantes a prezos que roldan os 70 euros mensuais, ben en vivendas, ben en establecementos hoteleiros. Ademais, os estudantes disporán dun servizo de bus directo ao campus de Vigo, por 25 euros ao mes.

O responsable de Aceba apuntou que, aínda que o proxecto arrinca con 70 vivendas e uns cen prazas hoteleiras, irase adaptando á demanda, e ten marxe de crecemento. De feito, lembrou que, en Baiona, hai uns 700 pisos que están “baleiros” todo o ano, excepto o mes de agosto.

Pola súa banda, o alcalde desta localidade, Anxo Rodal, convidou aos estudantes a aloxarse en Baiona e a gozar, ademais da tranquilidade, da contorna, as instalacións deportivas, a biblioteca, ou as posibilidades de lecer.

A vicerreitora Natalia Caparrini incidiu en que esta iniciativa permite achegar a Universidade a un dos municipios da comarca, e non só vai dirixida a estudantes, senón que pode interesar tamén a profesores, investigadores e alumnos de intercambio.