O goberno municipal de Vigo aclarou este xoves que a parella que vive nunha casa no Barrio do Cura, ámbito no que se iniciaron traballos de demolición, está a ocupar “ilegalmente” dita vivenda, que é propiedade municipal.
Así o trasladaron fontes municipais, tras a denuncia realizada por Marea de Vigo, que expresou a súa sorpresa porque se iniciou a derriba das edificacións do ámbito, sen ter en conta que dous veciños están censados alí.
O goberno vigués precisou que estes dous veciños foron atendidos polos servizos sociais municipais, e que se atopan á espera de cobrar unha axuda (a renda activa de inserción). Mentres tanto, o Concello ofreceulles “varias posibilidades de axuda”, como o pago dunha pensión ou dun aluguer temporal, ata que poidan cobrar esa renda.
