O alcalde de Vigo e presidente da agrupación socialista viguesa, Abel Caballero, eloxiou este martes a actuación de Pedro Sánchez no debate ‘a catro’ de TVE, ao que viu como “un presidente do Goberno”, fronte aos tres dirixentes de PP, Cs e Unidas Podemos, que “van seguir na oposición”.
A preguntas dos medios, Caballero apuntou que a intervención de Sánchez foi a dunha persoa “que sabía como hai que gobernar España, como hai que tratar a España, que falaba de política social, de pensións, do Salario Mínimo, dos subsidios a maiores de 52 anos, do goberno deste país”.
Por contra, na súa opinión, tanto Pablo Casado, como Albert Rivera e Pablo Iglesias “tiñan aparencia, rostro e dialéctica de oposición”. “Tres persoas que se vía que ían seguir na oposición outros 4 anos máis. É o que eu vin, e creo que o viu toda España”, sentenciou.
