A Estrutura Organizativa de Xestión Integrada (EOXI) de Vigo asegurou que non aceptará que os facultativos que compoñen a Asemblea de Médicos de Atención Primaria da área limiten o exercicio das súas funcións de xeito unilateral.

Mediante un comunicado, a EOXI referiuse así á advertencia da Asemblea, que este martes anunciaba que, nunha reunión fixada para finais deste mes, abordaría a adopción de medidas como a limitación do número de consultas e a suspensión da impartición de docencia nos centros de Atención Primaria máis sobrecargados.

A este respecto, a EOXI resaltou a obrigación dos profesionais de “atender ás necesidades sanitarias da poboación” e afirmou que “non pode asumir” que se limite o “dereito” da cidadanía a este servizo. Así mesmo, recalcou que, pese ao “conflito colectivo”, calquera reivindicación laboral debe respectar as “canles legais“. Nesta liña, asegurou que a Administración levará a cabo as “accións legais (…) necesarias” para garantir o dereito á asistencia médica da cidadanía.

FOLGA

Pola súa banda, o colectivo de Atención Primaria convocou unha folga a nivel autonómico neste servizo para os próximos 9, 10 e 11 de abril que foi secundada por todos os sindicatos con presenza neste sector, excepto o Sindicato de Enfermaría (SATSE). No marco da protesta pola sobrecarga asistencial, tamén terán lugar senllas concentracións en centros de saúde de Vigo e unha manifestación central que se celebrará o vindeiro xoves en Santiago.

Esta situación prodúcese tras a dimisión o pasado mes da maior parte dos Xefes de Servizo e Unidade da área sanitaria de Vigo como denuncia ante o que consideran que é unha situación de “precariedade” e “abandono” da Atención Primaria.

Mentres, a Xunta comprometeu un orzamento específico para equipamento destinado a este servizo que ascende a 17,3 millóns para 2019 e 2020. Tamén expuxo a creación dunha Dirección de Atención Primaria na estrutura do servizo galego de saúde e unha comisión do servizo na que se integrará aos xefes das distintas unidades, así como o incremento do acceso a unidades diagnósticas para os empregados deste servizo e o deseño dun Plan de Comunicación.

Ao enfrontamento coa Consellería sumouse o rexeitamento do colectivo de médicos eventuais da zona englobado en Precarias pola Atención Primaria ao contrato de continuidade proposto pola Xunta ao entender que leva unha dispoñibilidade de “24 horas (diarias)”.

Con todo, a Xunta entende que este documento, xa vixente e opcional para os facultativos, mellora a situación dos traballadores eventuais ao ofrecerlles un contrato de entre un e tres anos que se reduce a zona de traballo e establece unha programación mínima do 60 por cento do calendario. Ademais, detalla que a retribución anual “mínima” asignada ascende a 61.500 euros.