Axentes da Policía Nacional da Comisaría de Vigo detiveron a unha veciña da cidade de 19 anos como presunta autora dun delito de lesións, tras propinarlle unha puñada a outra muller, á que lle rompeu o nariz.

Segundo informaron fontes policiais, os feitos remóntanse á madrugada do pasado 6 de marzo, cando a vítima saía dunha discoteca na rúa Pontevedra. Tal e como denunciou a afectada, unha moza achegóuselle e, sen mediar palabra, propinoulle unha puñada.

Debido á forza do golpe, a muller caeu ao chan, e tivo que ser trasladada en ambulancia a un centro hospitalario, onde a interviñeron cirurxicamente horas despois, pola rotura dos ósos do nariz.

A Policía iniciou as pescudas e, tras interrogar a varias testemuñas, puideron identificar a presunta autora destes feitos, que foi localizada e detida este luns. A detida non tiña antecedentes policiais, e as dilixencias practicadas foron postas en coñecemento do Xulgado de Instrución número 1 de Vigo.