O alcalde de Vigo, Abel Caballero, atribuíu a unha esixencia de Feijóo o abandono do Pleno dos Vigueses Distinguidos por parte do grupo municipal do PP, e afirmou que a saída dos concelleiros populares debeuse a que o seu líder desde Santiago non quería que apoiasen o recoñecemento aos profesionais da Sanidade Pública.

No pleno extraordinario deste venres aprobouse a designación dos Vigueses Distinguidos de 2019 (varios centros educativos; o pintor Diego Giráldez; Radio Taxi; o director da Coral Casablanca, Óscar Villar; tres entidades veciñais e culturais; e os ex xefes de Atención Primaria da área sanitaria), ademais da Medalla da Cidade, para o Consorcio da Zona Franca.

Para Caballero, o PP marchou do pleno “porque llelo esixiu o señor Feijóo”, xa que estaban ante a tesitura de “ter que apoiar aos profesionais da sanidade e aos xefes dimisionarios que defenden a sanidade”. “Feijóo prohibiulles terminantemente que apoiasen a estes profesionais como un templo”, denunciou o rexedor olívico, quen precisou que o recoñecemento de Vigueses Distinguidos é “para todos os profesionais sanitarios”, aínda que “se simboliza nos que dimitiron”.

Abel Caballero preguntouse “que pretendía o PP” e ironizou sobre o feito de que quizá os ‘populares’ preferisen que se premiou “ao conselleiro de Sanidade”, ou “que viñese Feijóo” a recoller a distinción.

Segundo o alcalde, o que o PP fai nos plenos de Vigo “é unha vergoña política” porque, no seu “concepto especial da democracia”, “se non están de acordo con algo, levántanse e vanse”. “Isto convértese nun hábito antidemocrático, e todo por obedecer a Feijóo”, sentenciou.

Así mesmo, recalcou que a “dependencia política” do PP vigués con respecto a Santiago é “total” porque “se non, non van nas listas”, por iso están “sempre ao lado de Santiago, e nunca de Vigo”.