Axentes da Policía Nacional da Comisaría de Vigo detiveron a un veciño da cidade, de 40 anos de idade, como presunto autor dun delito contra a saúde pública por venda de drogas.

Segundo informaron fontes policiais, a investigación iniciouse hai uns días por mor das denuncias cidadás pola constante trasfega de toxicomános. A Policía despregou un dispositivo de vixilancia e puido constatar eses feitos, así como a presenza dun sospeitoso con quen se citaban os compradores. Este sospeitoso quedaba cos seus ‘clientes’ en diversos puntos predeterminados, e adoptaba medidas para evitar ser detectado.

Este martes foi abordado por axentes da Policía cando se dispuña a realizar novas vendas. No cacheo superficial, os axentes atopáronlle oculta entre a roupa “unha importante cantidade de cocaína” e diñeiro en efectivo.

O home foi detido e trasladado a comisaría, onde se comprobou que non ten antecedentes policiais. O arrestado e os efectos intervidos foron postos a disposición do Xulgado de Instrución número 5.