PSOE, BNG e Marea de Vigo mostrarónse contrarios a que se modifique o plan do Concello de Mos (Pontevedra) “co que se pretende facilitar a realización do proxecto deportivo e comercial” vinculado ao Celta.

Pola súa banda, o PPdeG subliñou que o plan é “competencia municipal” e interpretou que ese consistorio “foi capaz de ofrecerlle” ao club de fútbol o que o de Vigo “non foi capaz”, por “incompetencia do alcalde”, Abel Caballero.

Así, no pleno, a demanda non saíu adiante. O viceportavoz parlamentario de En Marea, Antón Sánchez, defendeu a iniciativa porque, ao seu xuízo, “nunca se debe apostar por volver a ese modelo do pelotazo” e o que busca esta iniciativa é “favorecer o negocio privado”, polo que “non se xustifica”.

“Preténdese, menos dun ano despois, recalificar chan”, denunciou, asegurando que “a maioría” dese chan é de “protección forestal” e “a metade”, montes veciñais en man común con instrumentos de ordenación aprobados.

“A sociedade civil foi a encargada de manter a actividade no monte e vostedes queren pasar por encima das súas opinións”, engadiu.

Por iso, propuxo que o Parlamento emita “unha declaración política”, xa que na súa opinión “isto non se pode permitir”. “Pedimos que non se aprobe a modificación puntual do plan para este megaproyecto deportivo e comercial”, remachou.

Na súa quenda, o deputado do BNG Luís Bará censurou o “contubernio” entre PP, Celta e un investidor no que considera “un negocio privado, especulativo de pirataría”. “É un despropósito, unha carallada”, resumiu.

“Radicalmente en contra deste proxecto”, comprometeu “todas” as “forzas” dos nacionalistas “para impedir que leve a cabo”, incluído o apoio a “todas as iniciativas en defensa do monte, da paisaxe, dos recursos e do comercio local, ameazado seriamente por este proxecto”.

Pola súa banda, o socialista Abel Losada criticou que “a Xunta con Vigo ten un mecanismo de actuación sorprendente” pois é a que “convida”, pero daquela a cidade “paga”.

“Neste caso convidan a Xunta e o Concello de Mos, o presidente da Xunta e a alcaldesa. Os veciños de Vigo pagan e o señor Mouriño cobra. Ese é o quid da cuestión”, sentenciou.

Deste xeito, reprobou a “alianza político electoral do presidente do Celta co da Xunta contra o alcalde de Vigo”, que desde o seu punto de vista “ponse de manifesto” con este asunto, posto que “é mentira que o Celta non poida construír no Concello de Vigo”. “Non podía construír o pelotazo dun centro comercial”, remachou.

Na súa quenda, o popular Alberto Pazos suxeriu que a oposición incita á Xunta a prevaricar, posto que o plan é competencia municipal e a autonómica “limítase á comprobación”.

Ademais, lembrou que o plan de Vigo foi “tombado legalmente” e acusou aos grupos de “enganar” aos veciños de Mos. “Amenten sobre as afeccións ás captacións de augas”, subliñou, antes de resolver que, para o seu grupo, esta proposición ten que ver coa proximidade das eleccións.