Axentes da Policía Nacional de Vigo identificaron a un veciño da cidade, de 79 anos de idade, como presunto autor de danos nas fechaduras de varios vehículos e no portal dun edificio, e que conta cunha ducia de antecedentes policiais por causar desfeitas en máis de 120 coches.

Segundo informaron fontes policiais, unha dotación do 091 trasladouse á rúa Xílgaro a última hora da tarde do domingo, tras recibir o aviso de que un home estaba a tentar golpear a outro na vía pública.

Ao chegar, atopáronse a un home suxeitando a un ancián que trataba de fuxir. O home relatou aos axentes que sorprendera ao septuaxenario raiando a aleta do seu coche cunha chave, e metendo un escarvadentes na fechadura.

Cando se achegou a chamarlle a atención, o ancián gritoulle e golpeouno na cara, causándolle diversas feridas e danándolle as lentes, antes de tentar fuxir do lugar. Ademais, outro veciño de zona denunciou aos axentes que o home tamén causara danos na fechadura do portal do seu edificio.

Segundo as testemuñas, este ancián ten “atemorizado” ao barrio, non só polos danos nos coches, senón porque é “habitual” que o home agreda ás persoas, golpeándoas co paraugas, o bastón, ou “calquera tipo de obxecto” que leve.

A Policía comprobou que, ademais do coche do requirente, había outros 6 vehículos que presentaban danos na carrozaría, e escarvadentes rotos introducidos nas fechaduras.

Os axentes contactaron coa comisaría para comprobar os antecedentes do ancián, e constataron que, só desde o 1 de xaneiro deste ano, ao home atribúenselle danos en máis de 120 coches e agresións a tres veciños, e conta con 12 antecedentes policiais.