Axentes da Policía Nacional da Comisaría de Vigo detiveron a un veciño da cidade de 23 anos de idade como presunto autor dun delito de agresión sexual a unha menor.

Segundo informaron fontes policiais, a investigación dos feitos iniciouse o pasado 8 de xaneiro, por mor da denuncia presentada pola nai da nena (que ten 14 anos de idade). Ese día, a última hora de tarde, a súa filla saíu o portal da súa casa na Avenida da Florida para facer unhas compras e un individuo abordouna, agarrándoa fortemente por un brazo, e obrigándoa a ir á parte de atrás dun edificio próximo.

Unha vez alí, e baixo ameazas, tendo á nena atemorizada, fíxolle tocamentos en partes íntimas. Cando o mozo se foi, a menor quedou en estado de ‘shock’, paralizada e sen reaccionar durante uns minutos, e sentada nun banco.

Cando logrou sobreporse e volver á súa casa, foi necesaria a intervención dos servizos sanitarios de urxencia, que a atenderon por unha crise nerviosa.

Os pais presentaron denuncia e o grupo UFAM da Comisaría de Vigo puxo en marcha a investigación, que concluíu coa identificación e detención do presunto autor da agresión, que tivo lugar este luns.

Unha vez trasladado a Comisaría, a Policía comprobou que ao detido cónstanlle dez arrestos anteriores, algúns deles por feitos violentos. O home e as dilixencias practicadas foron postos a disposición do xulgado de garda de Vigo.

Así mesmo, a Policía Nacional informou de que, no momento do arresto, dúas mozas fuxidas dun centro de menores permanecían no domicilio do presunto autor dos feitos e, tras coñecer a situación, ambas foron reintegradas.

Ademais, os axentes investigan se o presunto agresor está relacionado con outros feitos similares ocorridos recentemente.