O secretario xeral do PSDEG en Vigo, Abel Losada, manifestou este luns que os Orzamentos Xerais do Estado atenden “todas as demandas” que o Concello da cidade realizou ao actual Goberno de España.
“As grandes infraestruturas pendentes en Vigo aparecen recollidas e recibirán o empuxe que necesitan, logo de sete anos de goberno do Partido Popular, que paralizou de facto o seu desenvolvemento”, asegurou o socialista.
Abel Losada destacou que tanto a liña de Alta Velocidade Vigo-Ourense por Cerdedo como a finalización da autovía A-52 coa construción do tramo Porriño-Vigo e a transformación e humanización da Avenida de Madrid aparecen recollidas “explicitamente” na proposta orzamentaria presentada polo Executivo de Pedro Sánchez.
O socialista valorou o investimento na nova estación da AVE de Vigo, que recordou que está “comprometido” por un convenio e que “será asumida por Adif de forma inmediata na parte que lle corresponde”.
“Cos Orzamentos Xerais do Estado comeza o cumprimento dos compromisos do Goberno de España coa cidade de Vigo”, asegurou Losada, quen engadiu no seu comunicado que o presidente da Xunta de Galicia, Alberto Núñez Feijóo intentou “paralizar” as demandas de Vigo.
O líder do PSDEG en Vigo celebrou que estes orzamentos teñen dúas características “moi relevantes” para a cidade: a “aposta” polo “gasto social” e pola “investigación e innovación”.
O proxecto dos orzamentos xerais do Estado (PGE) que presentou o Goberno do socialista Pedro Sánchez prevé un investimento na provincia de Lugo duns 71,22 millóns de euros, o que significa algo máis do dobre dos case 33,8 millóns dos que dispón o Consorcio da Zona Franca de Vigo.
Por provincias, na comunidade galega, Ourense é a que percibe máis investimentos nas contas do Executivo de Sánchez: 269,65 millóns do sector público empresarial e fundacional, que en boa parte responden á AVE, a pesar da caída na recta final das obras; e 25,6 millóns do sector público administrativo estatal con orzamento limitativo.
A continuación sitúase A Coruña, que recibe un total de 227,94 millóns de euros, deles 172,84 procedentes de empresas públicas e demais organismos e 55,1 do sector público administrativo estatal.
Pontevedra sitúase en terceiro lugar cos seus 162,45 millóns: 93,22 millóns das entidades públicas e 69,23 millóns do sector público administrativo. Pecha a táboa Lugo, á que corresponden 18,86 millóns das empresas públicas e fundacións e 52,36 do sector administrativo do Estado.
No apartado de investimentos reais (que suman 554,57 millóns entre as catro provincias de Galicia), destacan, á marxe das contías reservadas para a alta velocidade, partidas como os 28,3 millóns para o porto exterior da Coruña e 27,64 para a accesibilidade ferroviaria ao de Ferrol.
Nesta provincia, a Sepi (sociedade estatal de participacións industriais) consigna un total de 42,08 millóns. Mentres, en Pontevedra, destacan outras partidas como 10,05 millóns de Portos do Estado para a plataforma loxística en Vigo
