O home detido en Vigo a pasada semana como presunto autor da morte do seu pai na parroquia de Sárdoma volveu a pasar a disposición xudicial á primeira hora deste luns.

O detido xa pasou polos xulgados vigueses este domingo, aínda que a xuíza de Instrución número 1, en funcións de garda, decretou a prórroga do seu arresto, precisamente para que este luns compareza ante o titular de Instrución 8, que é o que entende da causa.

O cadáver do octoxenario Manuel A.R. foi localizado por dous veciños de Sárdoma o pasado 7 de xaneiro a 600 metros do seu domicilio. O corpo, con signos de violencia, estaba oculto por vexetación e plásticos. Días despois, durante un rexistro na casa da vítima, o seu fillo máis novo recoñeceu que o matou no transcurso dunha discusión.