Traballadores da empresa Lugove-Subus, concesionaria do transporte en autobús no Baixo Miño e o Val Miñor, concentráronse este venres en Vigo, na terceira xornada de folga convocada contra a “explotación” e os “constantes” incumprimentos laborais por parte da empresa. Segundo informou a CIG, as protestas trasladáronse á cidade olívica (á estación de buses e á delegación territorial da Xunta) e o persoal critica que Lugove “segue sen porse en contacto co comité nin tenta chegar a acordos para resolver as numerosas problemáticas denunciadas”. De feito, o comité non descarta chegar á folga indefinida, tras as mobilizacións deste venres e dos pasados 7 e 14 de agosto.

O presidente do órgano de representación dos traballadores, Anxo Taboada (CIG), lamentou que o único movemento da empresa foi a través dos medios, para asegurar que ten un compromiso claro coa mobilidade e a seguridade dos usuarios e os traballadores. “Unha afirmación claramente hipócrita e cínica, tendo en conta que non están a facer nada para acabar con esta situación”, que a Xunta “lle permite”. Segundo advertiu, o persoal leva anos denunciado irregularidades en materia laboral (como as xornadas de ata 15 horas, o incumprimento dos descansos ou deficiencias de mantemento e limpeza, que xa foron sancionados pola Inspección de Traballo), e en medidas de seguridade e mantemento da frota, o que “deriva nun incremento das baixas” e en “incidencias habituais”. A todo isto, súmase un empeoramento da calidade do servizo, con horarios que non se cumpren ou viaxeiros que deben ir de pé no bus.

Taboada tamén lembrou que a concesión de Lugove está en situación de prórroga, porque a Xunta lle rescindiu o contrato e estase tramitando unha nova licitación. Por iso, o comité reclama á Xunta “que vele polos dereitos e a seguridade das persoas traballadoras e das persoas usuarias”.