A Xunta lembrou este venres ao alcalde de Vigo, Abel Caballero, que a auga “non é patrimonio exclusivo dun alcalde”, e insistiu en que a cidade olívica non lle fai “ningún favor” a outros concellos en materia de abastecemento, xa que estes pagan pola auga e polo seu tratamento. Así respondeu a conselleira de Medio Ambiente, Ángeles Vázquez, á carta remitida polo alcalde, na que insiste na necesidade de construír un segundo encoro no río Oitavén.

A conselleira lembrou que as competencias de abastecemento son municipais e que o apoio que a Xunta presta aos concellos non implica que esas competencias cambien de mans. “A Xunta estivo sempre ao seu lado, o que pasa é que el (Caballero) prefire o teatro do enfrontamento”, apuntou Ángeles Vázquez.

Tras lembrar que a auga “é de todos os cidadáns”, e non “patrimonio exclusivo dun alcalde”, a titular de Medio Ambiente sinalou que o Plan da Seca establece que, se Baiona precisa auga, conectarase ao sistema de Nigrán, que se abastece da presa de Zamáns, e matizou que non foi preciso levar a cabo ningún transvasamento desde a presa de Eiras a Zamáns.

“Non é coherente tratar politicamente un recurso compartido, como é a auga, coma se fose patrimonio exclusivo dun alcalde. Non, é patrimonio dos vigueses, dos de Mos, de Ponte Caldelas ou de O Porriño. Vigo non lle está facendo un favor a ningún dos concellos, e tampouco llo está facendo a Baiona”, remarcou, antes de aclarar que Baiona, cando se conecta ao sistema de Nigrán, paga “tanto a auga bruta como o tratamento” e que o servizo “non é gratis”.

Segundo reiterou, “Abel Caballero non ten a exclusividade de uso da auga de Eiras nin da de Zamáns”, e apelou a “coidar” entre todos este recurso esencial. Ao respecto, volveu insistir na necesidade de reducir as perdas da rede, aínda que a auga almacenada neste momento permite “garantir” o abastecemento ata finais de ano.

Con todo, remarcou que, “antes de criticar a xestión da Xunta”, Abel Caballero debería revisar as perdas da rede municipal viguesa, que os informes do propio Concello sitúan por riba do 20%, “por enriba do límite legal”. “Se fixese ben o seu traballo, non perdería un mes de auga de cada catro”, espetou a conselleira.

VÁLVULAS DA PRESA DE EIRAS

Todas estas consideracións foron trasladadas tamén por carta remitida ao alcalde olívico. Na misiva, a conselleira tamén se refire ás acusacións de Caballero sobre a xestión das válvulas da presa de Eiras. Ángeles Vázquez respóndelle ao alcalde que “non se pode nin se debe confundir a cidadanía” sobre as competencias de cada administración e que, se ben a Xunta xestiona a presa, a manipulación desas válvulas é competencia municipal, tal e como quedou acordado en xaneiro de 2023.

“E foi o Concello o que non comunicou o seu deterioro, o que provocou que a Xunta tivese que actuar de urxencia por valor de 2,27 millóns de euros para evitar que esa falta de actuación puxese en risco o abastecemento”, expón a carta.

CABALLERO DEVOLVE AS CRÍTICAS

A ‘guerra da auga’ entre o goberno municipal de Vigo e a Xunta de Galicia continúa e, tras as declaracións da conselleira Ángeles Vázquez, lembrándolle ao rexedor olívico que a auga non é “patrimonio exclusivo” seu, agora Abel Caballero volve insistir en que é Vigo a que ten que resolver os problemas de abastecemento e das conducións de auga en municipios da contorna, como Baiona, Moaña ou Redondela.

En declaracións remitidas aos medios, ironizou sobre esa cuestión, preguntando que, se non é Vigo quen soluciona eses problemas, será “o Papa de Roma”. “Esta conselleira non se decata”, afirmou, tras sinalar que tanto Ángeles Vázquez como o presidente Alfonso Rueda “deben ser os únicos de Galicia que non se decataron que hai problemas de abastecemento”.

Por outra banda, Caballero negou que a rede de Vigo teña perdas superiores ao 20%, e insistiu en que esas fugas se reducen ao 6,3%, as menores “de Galicia e de España”. Con respecto á débeda por falta de pagamento do canon a Augas de Galicia, o alcalde de Vigo repetiu que, nestes momentos, ese cobro está recorrido, no marco dun contencioso administrativo que está pendente de resolución do Supremo. “Está recorrido, en tanto non o digan os tribunais a débeda é cero ou é que non se decatou de que quen decide son os tribunais e non é ela?”, engadiu.