A Xunta de Galicia anunciou que coordinará co Concello de Vigo e coa Delegación do Goberno as actuacións necesarias para garantir a seguridade na contorna da estación de autobuses da cidade olívica, ante a presenza continuada de persoas sen fogar. Así se acordou nunha reunión entre representantes das administracións autonómica e local, indicando o Executivo galego que actuará como administración titular da infraestrutura de transporte coa instalación dun peche.
Con todo, pide apoio aos servizos municipais e á Policía Nacional. En concreto, lembrou ao goberno local que, conforme á normativa vixente, ten a competencia para a prestación de atención inmediata ás persoas sen fogar presenten na zona. “O Goberno galego asume a súa responsabilidade, como administración titular da infraestrutura, restrinxindo o acceso á zona para impedir usos inadecuados e contribuír a unha xestión máis eficiente das instalacións”, reivindicou a Xunta, que insiste en avisar ao Concello que lle corresponde a atención ás persoas en risco de exclusión social.
CONCELLO
Esta noticia non tardou en ter resposta do Concello. A conselleira Yolanda Aguiar mandou un audio aos medios de comunicación criticando a “deslealdade” da Xunta. “Apela a que son as entidades locais as que debemos facernos cargo das persoas sen fogar, o cal é radicalmente falso“, insistiu Aguiar, asegurando que o Concello ten a competencia da “atención inmediata” destas persoas, pero é o Goberno galego quen ten competencia “exclusiva” de acceso a unha vivenda digna.
