O Diario Oficial de Galicia (DOG) publica este mércores a resolución pola que se acorda a aprobación inicial e se somete a información pública o proxecto de expropiación, por taxación conxunta, dos bens e dereitos afectados pola execución da etapa 2 do proxecto de interese autonómico Factoría do Deporte Galego-Galicia Sports 360, en Mos (Pontevedra).
Desta maneira, estará á disposición da cidadanía durante un mes, para que as persoas interesadas poidan formular as observacións ou reclamacións que consideren oportunas. En particular, no relativo á titularidade ou á valoración dos seus respectivos terreos. Os terreos afectados nesta etapa 2 suman 70.520 metros cadrados, dos que 68.051 pertencen a 74 predios de titularidade de particulares. Os metros restantes corresponden á comunidade de montes de Tameiga, en Mos.
