O Diario Oficial de Galicia publica este mércores o anuncio do informe ambiental emitido pola Consellería de Medio Ambiente e Cambio Climático con respecto ao Plan Especial de Protección do ensanche histórico de Vigo, e que dá luz verde ao documento con condicións.

Así, o informe sinala que non son previsibles efectos ambientais adversos significativos, sempre que se cumpran unha serie de condicións relacionadas con aspectos arqueolóxicos, paisaxísticos, de zonificación acústica ou de mobilidade. Unha vez emitida a resolución, o informe ambiental foi remitido ao Concello de Vigo, xunto cos informes recibidos na fase de consultas previas.

O obxectivo do Plan é establecer a ordenación detallada do ensanche histórico de Vigo, un ámbito situado no centro urbano da cidade e cunha superficie de 60,5 hectáreas. No documento identifícanse sete pezas urbanas que presentan características homoxéneas e outras dúas áreas periféricas fortemente renovadas.

A proposta de ordenación prevé manter e recuperar como uso preferente o residencial, protexer e catalogar o patrimonio cultural, histórico-artístico e ambiental, e fomentar a rehabilitación de vivendas, ademais de preservar as actividades comerciais, de servizos e financeiras. Tamén se prevén medidas de “humanización” e peonalización, e outras para elevar os estándares de urbanización no relativo aos materiais e aos acabados.