A sede da Fundación Laxeiro, na Casa das Artes de Vigo, expón desde este martes e ata o 20 de setembro a mostra ‘Laxeiro, as viñetas que non foron ao prelo’, na que se rescata un grupo de debuxos inéditos do artista. A mostra é resultado dun labor de investigación continuada por parte da Fundación, e serve para conmemorar o 30º aniversario do falecemento do pintor. Así, os debuxos reflicten a un Laxeiro novo, retornado da Habana, e totalmente integrado nas correntes internacionais das vangardas de entreguerras.

Estas obras, polo seu estilo e técnica, parécense moito aos coñecidos como ‘Monos’ de Laxeiro, unha serie de 49 viñetas que o pintor publicou no Pobo Galego e Faro de Vigo entre 1928 e 1930. De feito, esas viñetas xa foron expostas pola Fundación en 2018. Na exposición inaugurada este martes, os visitantes poderán coñecer obras que son o antecedente daquela serie, como demostra o feito de que, no reverso dalgunhas imaxes, o autor escribiu diálogos entre os personaxes.

En calquera caso, e á marxe da finalidade dos debuxos, a Fundación destacou o “indiscutible interese histórico, narrativo, plástico e estético” das obras, relevante para o estudo e coñecemento da obra de Laxeiro. Tamén destacou que, a pesar da mocidade do artista cando fixo estas viñetas, xa se observa que “se decanta por unha obra radical, de gran forza expresiva e unha temática centrada na peripecia humana, principalmente en escenas populares”.