Concesionarios oficiais de grandes marcas xunto a empresas independentes especializadas en compravenda daranse cita desde este venres na Feira do Coche de Ocasión de Vigo, que reunirá a máis de 1.000 vehículos no Instituto Feiral de Vigo (Ifevi). Segundo informa a organización, a cidade olívica converterase esta fin de semana na “capital galega do coche de ocasión”, cun evento “inédito” ao xuntar nun mesmo espazo firmas oficiais e profesionais do sector.
Este martes, o salón de actos da Cámara de Comercio de Vigo, Vilagarcía e Pontevedra acolleu a presentación oficial da primeira edición desta feira, contando con representantes de Eventos Motor, do Ifevi e do comité organizador. Con preto de 20.000 metros cadrados de superficie, o salón desenvolverase entre o 5 e o 7 de xuño en horario de 11.00 a 20.00 horas, contando con vehículos de todos os segmentos: desde utilitarios ata coches de luxo, pasando por todocamiños, eléctricos, híbridos e furgonetas.
“O comprador poderá comparar prezos, garantías e condicións en tempo real, sen desprazamentos e co respaldo de profesionais”, reivindicaron desde a organización, ao tempo que avanzaron que os expositores acudirán con descontos e condicións exclusivas de feira. Esta primeira edición nace con vocación de permanencia e os promotores aspiran a consolidala como a gran cita anual do vehículo de ocasión, lembrando que a entrada terá un prezo de 3 euros.
