A Garda Civil, no marco da operación ‘Capitalpo’, desarticulou unha trama empresarial en Pontevedra dedicada á fraude mediante contratos de arrendamento de vehículos industriais. A operación saldouse coa detención de dous empresarios e a investigación dun terceiro, e coa recuperación dunha frota de vehículos valorada en máis de 1,5 millóns de euros.

Segundo informou o Instituto Armado, a armazón operaba entre Barcelona, Pontevedra e Vigo, utilizando “empresas pantalla” para obter vehículos a través de contratos financeiros fraudulentos, “cuxas cotas deixaban de abonar mentres continuaban sendo explotados pola empresa”.

En concreto, as pescudas comezaron en outubro do pasado ano tras unha intervención dunha patrulla de Tráfico en Sanxenxo, onde se interceptou un vehículo que figuraba como subtraído en Madrid. Por mor deste achado, os axentes localizaron outros vehículos en situacións similares, incluíndo furgonetas nunha nave vinculada a unha construtora de Vigo e un camión intervido en Tui.

Durante o primeiro trimestre de 2026, a Garda Civil localizou outros catorce camións e remolques distribuídos entre as provincias de Pontevedra e Murcia. Os investigadores detectaron contratos supostamente falsificados, firmas suplantadas, domicilios ficticios e o uso de sociedades sen actividade real para ocultar o destino dos vehículos.

Na intervención, detívose en Pontevedra ao principal investigado, vinculado a sociedades en Barcelona e a cidade do Lérez, e en Vigo ao representante dunha empresa de construción. Así mesmo, investigouse ao administrador de varias sociedades en Poio. Durante os rexistros efectuados na sede da construtora en Vigo e nun domicilio en Pontevedra, os axentes interviñeron documentación física e dixital.

A investigación tamén revelou conexións destas mercantís con procesos de “quebra” de diversas empresas do sector dos conxelados. A operación foi liderada polo Grupo de Patrimonio da Policía Xudicial de Pontevedra, con apoio do Grupo GIAT de Tráfico. Con todo, as dilixencias continúan abertas baixo a dirección do Tribunal de Instancia de Barcelona.