Unha muller, de 43 anos de idade, foi detida o pasado domingo despois de ameazar á caixeira dun establecemento cunha navalla para levar o diñeiro da caixa. Segundo informa a Policía Local, os feitos ocorreron sobre as 18:20 horas nun local da rúa Venezuela. Alí, a agora detida ameazaría á empregada cunha navalla indicándolle que “non se ía ir sen o diñeiro”.

A escena foi observada por un cliente, que chamou aos axentes. Unha vez no punto, a suposta agresora tratou de pasar desapercibida entre os demais clientes, que rapidamente a sinalaron como a autora dos feitos. Así, foi detida como suposta autora dun delito de roubo con intimidación en grao de tentativa, despois de achar a navalla entre as súas pertenzas.