A Feira Internacional de Produtos do Mar Conxelados Conxemar e o Congreso FAO-MAPA xeraron 98,4 millóns de euros en produción, contribuíndo con 53,4 millóns de renda á economía de Vigo e a súa área e creando uns 1.246 postos de traballo.
Así se desprende do informe sobre o impacto socioeconómico destes dous eventos elaborado pola Universidade de Vigo no marco da Cátedra Ardán, coa colaboración da Asociación Conxemar e a Zona Franca. Este estudo foi presentado este mércores na sede do Consorcio polo delegado do Estado, David Regades; o alcalde de Vigo, Abel Caballero, e o presidente de Conxemar, Eloy García. Nel destácase á Feira Conxemar como “motor relevante de actividade económica”.
“De feito, o impacto sobre a renda local equivale aproximadamente ao 0,4% do produto interior bruto (PIB) anual da comarca de Vigo”, destacou o autor do informe, Carlos Rodríguez, do Grupo Rede, que foi o encargado de detallar os principais indicadores do mesmo. Ademais, o documento subliña a “significativa” dimensión comercial do encontro. Así, durante a 26ª edición da Feira alcanzáronse acordos comerciais por valor de 831,7 millóns de euros, unha cifra que representa preto do 4,5% da facturación total do sector da industria e comercialización de produtos pesqueiros en España, engade.
Por iso, a estimación do impacto económico asociado á actividade de negocio revela que na comarca de Vigo tradúcese en 698,3 millóns de euros en produción, 303,4 millóns en renda e a xeración de 6.224 empregos. Se se amplía a perspectiva a Galicia, o impacto alcanza 857,9 millóns de euros en produción, 372,7 millóns en renda e a creación de 7.646 postos de traballo.
