Axentes da Policía Local de Vigo interceptaron nos últimos días a dous condutores de patinetes eléctricos que circulaban baixo os efectos das drogas, e que foron identificados en controis rutineiros. Segundo informaron fontes policiais, un dos denunciados, un home de 57 anos de idade, foi interceptado na Baixada a Ríos e deu positivo en opiáceos, anfetaminas, metanfetaminas e cocaína.

O segundo denunciado, un home de 42 anos, foi interceptado cando circulaba pola rúa Torrecedeira, e deu positivo para cocaína na proba de tóxicos. En ambos os casos, os vehículos foron inmobilizados ata que outras persoas puideron facer cargo deles. Os condutores foron propostos para sanción.

A Policía Local  lembrou que todo condutor de VMP (Vehículos de Mobilidade Persoal) está suxeito á normativa de seguridade viaria e está obrigado a someter ás probas de alcol e drogas cando sexan requiridos polos axentes da autoridade.