O Instituto Español de Oceanorafía (IEO) desenvolveu un estudo en colaboración co Grupo para o Estudo do Medio Mariño (GEMM), o Aquarium Finisterrae e a Universidade de Vigo, no que documentou dous novos rexistros de peixe globo en augas galegas, como consecuencia da “progresiva” tropicalización do mar.
En concreto, o traballo analizou a distribución de ditas especies en augas españolas, detectando novos rexistros en Galicia de dous peixes globo “pouco frecuentes”. O primeiro deles o chamado ‘tamboril verde‘, capturado en 2021 fronte á Costa da Vela, e o segundo deles o ‘tamboril de terra‘, localizado en 2025 na Ría de Pontevedra–. Así, segundo trasladou a entidade nun comunicado, este constitúe o primeiro rexistro documentado de ‘tamboril verde’, e o segundo de ‘tamboril de terra’ en Galicia, o cal, tras realizar unha análise histolóxica reprodutivo, revelou que se trataba dunha “femia en fase de posta”.
ESPECIES DE PEIXE GLOBO
O estudo realizado constatou, ademais, que algunhas especies de peixe globo poden conter toxinas como a tetrodoxina, “unha das neurotoxinas naturais máis potentes coñecidas”, No entanto, os seus autores inciden en que actualmente o risco de intoxicación en España é baixo, xa que “estas especies non se comercializan e a súa venda está prohibida” na Unión Europea.
Con todo, os investigadores advertiron de que o aumento da súa presenza “fai necesario reforzar o seguimento científico e a identificación de especies potencialmente tóxicas”. “Coñecer a composición, a distribución xeográfica e a toxicidade potencial das especies é importante para a súa detección precoz e alertar á poboación sobre os riscos. Deste xeito, pódense previr problemas de seguridade alimentaria con consecuencias potencialmente graves derivadas do seu consumo accidental”, subliñou Rafael Bañón, investigador do Centro Oceanográfico de Vigo do IEO.
Así mesmo, a investigación incluíu unha revisión de todas as especies rexistradas en augas españolas, informando de que “até a data” documentáronse 26 especies pertencentes a cinco familias no conxunto do territorio español, que se distribúen en 22 especies nas Illas Canarias e 15 especies na Península Ibérica e Baleares.
