O BNG de Vigo esixiu un reforzo para o punto de atención continuada (PAC) da rúa Pizarro e a creación doutros dous novos nos barrios de Navia e Teis para facer fronte ao “colapso sanitario” que vive a cidade. Nun comunicado, os nacionalistas denunciaron a “grave crise sanitaria” que sofre Vigo, que está nunha “situación límite” que, ao seu xuízo, “xa non pode seguir sendo ignorada pola Xunta do PP”.
Para o portavoz local do Bloque, Xabier Pérez Igrexas, a “saturación” da Atención Primaria e o “colapso” das urxencias do hospital Álvaro Cunqueiro “evidencian que o actual modelo sanitario está desbordado e esgotado”. Segundo Igrexas, esta situación non é “accidental”, senón “consecuencia directa” das “nefastas” políticas dos ‘populares’, sendo Vigo a “zona cero” das mesmas.
Por todo iso, desde o BNG volveron a reclamar a ampliación da capacidade asistencial da PAC de Pizarro, así como a creación doutros dous novos na contorna de Navia e Coia e en Teis. Estes permitirían, engaden, “dar resposta a unha carga asistencial que se traduce en centos de persoas esperando durante horas e pacientes amoreados nos corredores das urxencias hospitalarias pola falta de alternativas extrahospitalarias”.
