Unha veciña de Vigo foi trasladada ao Hospital Álvaro Cunqueiro ao resultar ferida, con queimaduras, nun incendio ocasionado no interior da súa vivenda, situada no barrio de Lavadores. Segundo informa o 112 Galicia, os equipos de emerxencia sitúan a súa orixe na explosión dun fornillo de gas. O Centro Integrado de Atención ás Emerxencias de Galicia (CIAE) recibiu o aviso ao redor das 07.00 horas deste domingo, cando un particular alertou de que estaba a arder a planta baixa da casa dunha veciña.
A continuación, a sala de operación informou os Bombeiros de Vigo, así como aos axentes da Policía Nacional e Local. Ademais, o Servizo de Urxencias Sanitarias de Galicia-061 mobilizou unha ambulancia ata o lugar do suceso.
Unha vez finalizada a intervención, os equipos de emerxencia indicaron que o incendio tivo a súa orixe na explosión dun fornillo de gas, que provocou danos na cociña da vivenda e causou diversas queimaduras á propietaria, que necesitou traslado hospitalario.
