A Xunta de Galicia criticou que o Goberno poña a disposición dos cidadáns de Vigo supostos pisos de “aluguer accesible” pero con prezos por metro cadrado superiores ao custo medio na cidade.

En declaracións remitidas aos medios de comunicación, o Executivo autonómico lamentou esta situación, insistindo en que, segundo datos do Observatorio de Vivenda de Galicia, o prezo medio do aluguer na urbe olívica entre xaneiro e outubro foi de 7,5 euros o metro cadrado, por baixo dos 8,8 euros o metro que ofrece o Goberno central.

“O Ministerio de Vivenda vai a externalizar e a pór en mans privadas as 40.000 vivendas públicas da Sareb, entre elas 67 en Vigo, cun custo económico importante. Unha situación absurda que complica innecesariamente a xestión. Sería máis fácil que o Goberno central cedese estes activos á Xunta, tal e como levamos anos reclamando”, subliñou.

Respecto diso, explicaron que estas vivendas eran nun primeiro momento do SEPES (Entidade Pública Empresarial de Chan), para logo pasar a mans da Sociedade Pública de Vivenda do Estado e agora de Casa 47, “todo sen acordar ou consultar coas comunidades autónomas”.

“Non sabemos xa que sentido teñen as conferencias sectoriais que convoca o Ministerio porque non informa de nada. Veñen a Galicia a anunciar un novo modelo de xestión de vivendas SAREB. A Xunta decátase, unha vez máis, pola prensa, o que demostra unha falta absoluta de lealdade institucional”, apuntaron.

Para o Goberno galego, “o peor é que se descoñece como será o proceso de adxudicación e se serán vivendas con cualificación permanente”. “De novo, pedimos ao Goberno central que se deixe de improvisar e, neste caso, ceda as vivendas á Xunta”, sentenciou.