O alcalde de Vigo, Abel Caballero, acusou ao PP de Vigo de querer “branquear” a súa posición ao reclamar este sábado unha facultade de Medicina para a cidade olívica cando “nunca se lles ouviu dicir nin defender esta facultade”, tal e como lles afeou o rexedor. Neste contexto, a presidenta do PP local, Luisa Sánchez, que ata agora apelara a un acordo entre as universidades, reclamou este sábado unha facultade para Vigo e anunciou que pedirá un pleno extraordinario para abordar o tema.
“Chámanos a atención porque nós presentamos no pleno hai uns días unha moción instando a que a facultade de Medicina se instalase en Vigo e, por tanto, reprendendo a Rueda e ao conselleiro porque teñen unha oposición inadmisible contra a cidade de Vigo e o PP votou en contra”, lembrou Caballero. Á vez que se dirixiu aos populares para insistir en que “se queren un pleno extraordinario, que o soliciten” pero fixo fincapé en que “o certo é que o que tentan é branquear a súa posición”.
Cómpre lembrar que o rexedor vigués xa insistiu esta semana no seu rexeitamento á fórmula da descentralización e atopou nas discrepancias existentes na Universidade de Santiago de Compostela (USC) a “garantía” de que este procedemento “non vai funcionar”. Na última reunión do Consello de Goberno da USC, o reitor, Antonio López, decidiu retirar a votación sobre o acordo de descentralización tras as reticencias da facultade compostelá ao pacto e coa intención de abrir unha “vía de diálogo” co centro.
Paralelamente, a UDC avanzou que “dará continuidade” aos traballos para contar coa súa propia facultade de Medicina. Con todo, Caballero insistiu este domingo en que ata que a Xunta apoie esta facultade “seguirá reivindicando esta facultade de Medicina porque a Universidade de Vigo meréceo, porque é unha grande universidade”.
