O alcalde de Vigo, Abel Caballero, celebrou este venres o inicio do estudo informativo complementario para avaliar o impacto ambiental do AVE Vigo-Madrid por Cerdedo.
Nun audio enviado aos medios de comunicación, o rexedor reivindicou que o Goberno de España está “a cumprir” co “compromiso” que asumiu co AVE Vigo-Madrid por Cerdedo.
Así, explicou que se trata dun novo estudo complementario aos que xa se fixeron, indicando que se espera que no primeiro trimestre de 2027 salga a exposición pública o estudo de impacto ambiental, para que poida realizarse a súa redacción definitiva e, posteriormente, iniciar a obra.
Caballero volveu a aproveitar para cargar contra o PP, indicando que “deixaron caducar” o anterior estudo de impacto ambiental que xa se realizou cando José Luís Rodríguez Zapatero era presidente do Executivo central.
Todo iso despois de que o Ministerio de Transportes e Mobilidade Sustentable publicase este venres no Boletín Oficial de Estado (BOE) a formalización do contrato dun estudo informativo complementario da liña de alta velocidade entre Vigo e Ourense por Cerdedo.
En concreto, foi a UTE Antea-Meta-Inge a adxudicataria, polo que se encargará de redactar o devandito estudo por algo máis de 835.000 euros.
