O alcalde de Vigo, Abel Caballero, insistiu este xoves en que o servizo de bombeiros da cidade “cumpre sobradamente” co número de efectivos que, segundo criterios técnicos, deben estar operativos para garantir a cobertura e seguridade, e cualificou de “mentirosos” a quen, como os partidos da oposición e os sindicatos, denuncian que non hai bombeiros suficientes.

En declaracións aos medios durante unha visita ao parque de bombeiros de Teis, o rexedor olívico quixo pór en valor a cooperación dos bombeiros da cidade na extinción dos incendios forestais que arrasan parte de Galicia, e tamén destacou a capacidade e os recursos deste servizo municipal.

“Eu quero desde aquí felicitalos, felicitar a todos os efectivos que foron actuar nestes incendios”, proclamou, e engadiu que o servizo segue “a disposición da Xunta” para actuar nos lumes “axiña que como os necesite”, como fixo xa en puntos como Muxía, Salceda, A Rúa ou Ribadavia.

Con respecto ás críticas (o BNG volveu reiteralas este mércores) por unha suposta falta de efectivos nos parques municipais, o alcalde cualificou de “mentirosos” a quen fan esas afirmacións. Segundo remarcou Caballero, o número necesario de efectivos para garantir a seguridade na cidade (que, segundo ese criterio técnico, sería de 16) “cúmprese sobradamente”.

“E quen di que non, mente. E sabe que está a mentir, sabe que está a mentir. Hai o número de bombeiros necesarios para atender a Vigo, no criterio dos técnicos deste Concello. Non o decide un grupo político, decídeno os que saben”, proclamou o alcalde, que lembrou que a cidade conta cun persoal de 108 bombeiros que, antes a final de ano, aumentará ata os 140 con novas incorporacións.

Tras insistir en que “Vigo é unha cidade ben atendida en termos de extinción de incendios e en termos de material”, o rexedor volveu a criticar aos que “amenten sempre”, a quen reprochou que non recoñezan os avances no servizo nos últimos anos, como a incorporación de persoal, a adquisición de novos vehículos e material, ou a reforma e construción dos parques de bombeiros.

“Aos mentirosos hai que contestarlles sempre (…) Sempre hai grupos políticos que están a dicir que Vigo moi mal. Pois seguramente Vigo foi o único que contribuíu nestes incendios de Galicia desde unha cidade. Daquela Vigo, moi ben. Non moi mal. Moi ben”, resolveu.