O alcalde de Vigo, Abel Caballero, insistiu este mércores en que a Xunta de Galicia “paralizou o túnel de Elduayen durante máis de tres anos”, ao que a delegada do Goberno galego na cidade, Ana Ortiz, contestou: “Mente e sábeo”.

E é que esta mañá se produciu un novo cruzamento de acusacións entre ambas as administracións por esta infraestrutura, despois de que, unha vez Patrimonio Cultural dese o seu visto e prace e o Goberno galego anunciase que a cofinanciaría con ata 17,8 millóns, o Concello denunciase que está pendente un informe da Consellería de Medio Ambiente.

“O 16 de xuño enviamos dous informes á Xunta relacionados co túnel e ata que non nos contesten Cultura e Medio Ambiente non podemos proceder co avance da obra. Séguennos parando o túnel do Paseo de Alfonso”, subliñou Caballero, asegurando que non recibiu comunicación sobre o cofinanciamento autonómico da devandita obra.

Estas declaracións tiveron unha pronta resposta por parte de Ortiz, indicando que o rexedor “mente e sábeo” e defendendo que “non hai nada pendente” da Consellería de Medio Ambiente.

“Deixe de enredar, faga o que ten que facer, faga os seus deberes, traballe e avance no proxecto do túnel de Elduayen, que ten para desde fai sete anos”, lamentou a delegada da Xunta en Vigo.

“A Xunta xa lle dixo que vai pór 17,8 millóns e iso parece ser o que máis lle molesta, que a Xunta demostre que inviste en Vigo e o seu falso argumento caia en por si”, sentenciou.