Renfe anunciou que facilitará a mobilidade dos viaxeiros con máis de 350 servizos de autobuses durante as obras de Adif entre Redondela e Vigo Guixar en setembro e outubro.

Segundo trasladou a empresa nunha nota de prensa, os traballos suporán o corte ininterrompido da circulación no devandito tramo desde a última hora de cada venres á primeira do luns seguinte.

En concreto, os días de afectación serán do 5 ao 8, do 12 ao 15, do 19 ao 22, e do 26 ao 29 de setembro. Así mesmo en outubro prevese a modificación do servizo do 3 ao 6 e do 24 ao 27.

A compañía de transporte asegurou que “garantirá a mobilidade dos viaxeiros cun plan alternativo” que inclúe traslados por estrada para algúns trens (coa programación de máis de 350 servizos de autobuses e 70 de taxis) e tamén a modificación puntual dalgúns servizos Rexionais, Alvia e Intercity.

Desta maneira, Adif avanza na modernización da liña Ourense-Vigo –liña do Miño– para “adecuala ao Corredor Atlántico, reforzar a conexión con Portugal e aumentar a súa capacidade para tráfico de viaxeiros e mercadorías”.