A pesar da veda e da parada biolóxica, a pesca ilegal segue sendo un problema nas costas galegas, especialmente no sur. Gardacostas de Galicia mantén unha loita sen descanso contra estas prácticas, e esta semana realizou un novo decomiso de aparellos prohibidos na zona de As Orelludas, en Oia, un punto habitual para este tipo de actividades ilícitas. 

Durante a intervención, a patrullera Punta da Guía localizou e retirou do mar 306 alcatruces (tamén coñecidos coma cacharros), un tipo de trampa ilegal para a captura de polbo. Ademais, no interior destes aparellos atopáronse 22 femias con ovos, unha práctica especialmente daniña para a conservación da especie. Os axentes devolveron ao mar uns 30 quilos de polbo capturado ilegalmente e levantaron a acta correspondente pola infracción. 

Esta acción prodúcese poucos días despois dunha das maiores incautacións do ano, cando Gardacostas interceptou máis de 2.000 aparellos prohibidos entre Cabo Silleiro e A Guarda. Na operación, na que participaron catro embarcacións, recuperáronse 2.073 *cacharros*, oito trasmallos sen identificar e 377 quilos de polbo, incluíndo 28 femias ovadas. Todo o marisco foi devolto ao mar, pero os responsables non puideron ser identificados. 

A Consellería do Mar recorda que a pesca do polbo está prohibida ata o 1 de xullo debido á parada biolóxica, unha medida clave para asegurar a recuperación da especie. Con todo, os casos de furtivismo seguen a multiplicarse. 

Este último operativo ocorre pouco despois doutra gran intervención preto de Cabo Silleiro, onde se identificou un barco portugués con 248 quilos de polbo e 865 trampas ilegais. Ademais, hai un mes detectáronse aparellos activos no Parque Nacional das Illas Cíes, e en abril xa se desarticulara un grupo de furtivos en As Orelludas usando a mesma técnica. 

A batalla contra o furtivismo segue aberta, e Gardacostas segue a reforzar a súa presenza nas zonas máis sensibles para protexer os recursos mariños.