O home acusado dun delito de lesións con perda de órgano e sentido, Pablo C.O., tras deixar á súa parella sen un ollo despois dunha agresión, recoñeceuse autor dos feitos e aceptou a pena de 5 anos de cárcere, nunha vista de conformidade que tivo lugar na sección quinta da Audiencia Provincial de Pontevedra, con sede na cidade olívica.

Os feitos ocorreron na madrugada do 22 de abril de 2023, cando o acusado e a súa parella saíron dun pub de Vigo discutindo. A Fiscalía expón no seu escrito de acusación que o procesado, tras un forcejeo, propinou puñadas e cotenadas ao outro home na cara, facendo que este caese ao chan, onde seguiu dándolle patadas.

Como consecuencia da malleira, a vítima sufriu diversos traumatismos na cara, entre eles a rotura do globo ocular esquerdo, e tivo que estar hospitalizada e pasar por varias intervencións cirúrxicas.

O acusado, para o que a Fiscalía pedía inicialmente 11 anos de prisión, está diagnosticado de trastorno de personalidade de tipo inestable e impulsivo e, no momento dos feitos, a súa capacidade volitiva estaba parcialmente abolida.

Tras recoñecer a autoría dun delito de lesións con perda de órgano e sentido, Pablo C.O. aceptou a pena de 5 anos de cárcere e a prohibición de comunicarse ou achegarse a menos de 500 metros da vítima. A responsabilidade civil quedou fixada en 100.000 euros, máis os 4.114,10 euros de gastos ocasionados ao Sergas.