O grupo municipal do PP de Vigo acusou ao goberno local de “tentar desentenderse” da suspensión das probas para as oposicións a bombeiro e condutor de bombeiro, esixíndolle que “asuma a súa responsabilidade”.

O portavoz popular no Concello, Miguel Martín, lamentou que nin o alcalde, Abel Caballero, nin a concelleira responsable, Patricia Rodríguez, comparecesen publicamente para dar explicacións sobre a decisión de pospor os exames previstos. Un adiamento que causou un “imperdoable” prexuízo ás 630 persoas que buscaban sacar unha praza neste corpo municipal.

“Pero máis grave aínda é o seu lamentable intento por desvincularse desta decisión apelando a que o tribunal actúa de forma autónoma”, advertiu o edil vigués en relación a unhas xustificacións recollidas nalgúns medios de comunicación. “Estamos de broma, non? Quen é o responsable do servizo municipal de bombeiros? Quen convoca as oposicións? Obviamente, aquí o único culpable é o goberno de Abel Caballero e por tanto é a el a quen hai que pedir explicacións e, sobre todo, responsabilidades”, sinalou.

“É vergoñoso ter que dicirlle a un opositor que veu desde a outra punta de España que volva á súa casa porque non deu tempo a ter listas as probas. Pero é máis lamentable aínda escoitar o silencio deste goberno municipal, que non só se oculta e non fala, obviando as súas responsabilidades, senón que tenta quitarse os problemas de encima lanzando a pelota ao tellado doutros”, proseguiu o portavoz municipal do PP de Vigo.