O presidente da Real Federación Española de Fútbol (RFEF), Rafael Louzán, cualificou este venres a Abel Caballero como “alcalde populista” por facer unha “polémica interesada” tras o sucedido esta semana coa posible irregular exclusión de Vigo como sede do Mundial de 2030.
“Está a haber unha polémica interesada por parte do alcalde populista de Vigo en relación ás sedes do Mundial. Este señor está na súa salsa“, aseverou Louzán na presentación do Observatorio do Deporte Feminino celebrado na Universidade Rei Juan Carlos (URJC) de Madrid.
O mandatario replicou así ás críticas recibidas por parte de Abel Caballero por mor da información de ‘El Mundo’ do pasado luns na que dicía que os criterios se manipularon para favorecer a San Sebastián e a Anoeta en detrimento do ABANCA Balaídos e Vigo, algo que parece descartar a RFEF.
O dirixente federativo aproveitou a súa intervención na primeira mesa redonda baixo o título ‘Rexeneración ética e xurídica da RFEF’ para recalcar que o edil galego “sempre o leva ao terreo político, pero xa se lle coñece”.
Louzán explicou que Caballero trata de “xustificar” o que a cidade non sexa sede do Mundial do 2030, aínda que sabe que coa remodelación do Estadio de Balaídos contará con 27.0000 espectadores e “sabe que a FIFA esixe 43.000 espectadores para que ese estadio poida ser sede mundialista”.
Ademais, lembrou que ese traballo para decidir as sedes correspondeu ao equipo federativo que lideraba Luís Rubiales polo que el pouco pode achegar. “Eu cheguei á presidencia da Federación o 16 de decembro e a decisión corresponde a xullo do 2024″, apuntou, recalcando tamén que antes da súa chegada á presidencia había a Comisión de Supervisión, Normalización e Representación creada “polo Consello Superior de Deportes e liderada por Vicente do Bosque”.
Con todo iso, Louzán reiterou que desde a RFEF loitarase para que “Vigo e Valencia estean como sedes mundialistas”. “Vou defender ambas as sedes. Tentaremos que as cidades que se quedaron fóra, neste caso, foron Vigo e Valencia poidan ter esa oportunidade de estar como sedes mundialistas”, comentou.
“Valencia ten máis que xustificada tamén a súa presenza, que vai ter un novo estadio de 70.044 espectadores, un dos estadios máis modernos que vai ter o fútbol español para o Mundial de 2030. Non parece lóxico que toda esa franxa do Mediterráneo non teña a oportunidade de ser sede deste Mundial”, destacou.
“Pero todas estas cousas eu creo que hai que levalas da maneira que tocan, contribuíndo a que se negocien e saian ben as cousas, e por tanto a Federación está nese camiño, de facer ben as cousas e estámolo demostrando”, concluíu o presidente da RFEF.
