A titular do Xulgado de Instrución número 3 de Vigo citou a declarar como investigado ao propietario do Saltamontes no que se produciu o accidente mortal nas festas da parroquia viguesa de Matamá na madrugada do 3 de agosto do ano pasado.

Segundo fontes do Tribunal Superior de Xustiza de Galicia (TSXG) consultadas por Europa Press, o xulgado citou para declarar ao home en calidade de investigado.

Foi na madrugada do venres para o sábado, 3 de agosto, cando un mozo de 36 anos faleceu nas festas de Matamá, en Vigo, tras romper un brazo dunha atracción de feira e quedar encaixado na estrutura.

O home, veciño da cidade olívica e natural de Viana do Bolo, estaba acompañado dunha muller, que saíu ilesa do accidente.

A partir de aí, comezou unha investigación xudicial para esclarecer o ocorrido, imputándose agora ao propietario do Saltamontes, que acudirá a declarar previsiblemente nas próximas semanas.