O salón de Plenos do Concello de Nigrán acolle desde este venres unha exposición na que, entre outros elementos, pode visitarse o mosaico romano de Panxón, do século III d.c., recentemente recuperado tras varios anos de trámites.
A peza, nun estado excelente de conservación e que mostra un peixe e outros elementos mariños, exhíbese xunto a outros achados realizados na zona do castro de Panxón, e será visitable de luns a venres de 10,00 a 13,00 horas e de 16,00 a 19,00 horas, e tamén sábados e domingos, de 9,30 a 13,00 horas e de 17,00 a 19,00 horas. Cando finalice a exposición, o mosaico instalarase de forma definitiva na Biblioteca Municipal
“Celebramos o regreso a Nigrán desta xoia arqueolóxica como ben público do que sentirnos orgullosos, e esperamos que os veciños se acheguen a coñecela de preto”, sinalou o alcalde de Nigrán, Juan González, que recalcou que ese “fito cultural sen precedentes” debe ser “celebrado”, xa que o mosaico converteuse en “un emblema para Nigrán”.
A mesa na que está instalado o mosaico preside o salón de Plenos, que foi musealizado por Árbore Arqueoloxía, e no que tamén poden verse restos vinculados co castro de Panxón (cerámicas e un conchero), réplicas de cerámicas da época, muíños de pedra atopados en Panxón, ou imaxes doutros restos do castro. Igualmente, a exposición compleméntase con tres imaxes cedidas por Erea Castro, do período no que o mosaico estivo na casa de Ricardo Branco Cicerón, na Coruña.
Ademais de visitas guiadas á propia mostra, con explicacións do arqueólogo Benito Vilas, organizaranse visitas guiadas por Panxón os fins de semana.
O mosaico mide 84×84 cm e está encastrado nunha mesa de madeira feita no s. XIX, sendo o único fragmento que se conserva do pavimento orixinal. A súa pista perdeuse en 2000 tras unha poxa na Galería Castelá de Madrid, e reapareceu en 2018, á venda no catálogo da casa Carlton Hobbs de Nova York.
Desde ese momento, o Concello puxo en marcha os trámites para recuperalo, coa axuda da Asociación para a Repatriación do Mosaico Romano de Panxón. Finalmente, pechouse a súa adquisición, para a que o consistorio achegou 40.000 euros, e o resto, ata 58.000 euros, conseguiuse a través dun ‘crowdfunding’.
En xaneiro de 2022 a peza partiu cara á sucursal de Carlton Hobbs en Londres, onde estivo un ano ‘parada’ debido á burocracia polo ‘Brexit‘. En novembro trasladouse a Madrid, á galería Colnaghi, onde estivo exposta ata que, hai dúas semanas, emprendeu a viaxe definitiva de regreso a Nigrán. Agora, están en marcha os trámites para declaralo Ben de Interese Cultural.
