O delegado da Zona Franca, David Regades, e o reitor da Universidade de Vigo, Manuel Reigosa, asinaron este martes o novo convenio que marcará durante os próximos catro anos (2025-2028) as bases de colaboración entre ambas as institucións para a Cátedra Ardán.

O novo marco colaborativo, segundo explicou o Consorcio nun comunicado, suporá o incremento da partida orzamentaria ata os 960.000 euros para ampliar as horas de investigación conxunta. Isto xorde debido á crecente demanda de análises específicas de axentes sociais que buscan o selo de “rigor, independencia e prestixio” dos estudos de Ardán, segundo reivindica Zona Franca.

Coa presenza do alcalde de Vigo e presidente do Consorcio, Abel Caballero, ambas as institucións puxeron en valor o compromiso de colaboración para seguir contribuíndo ao desenvolvemento económico e social de Galicia a través do deseño, elaboración e difusión de estudos e ferramentas baseados na investigación, a transferencia de coñecemento e a vixilancia da contorna empresarial e socioeconómica.

Regades agradeceu a Reigosa a súa implicación tanto na Cátedra como noutros temas nos que colaboran ambas as institucións. “Podemos presumir que todos os proxectos europeos que presentamos ao Goberno de España ían cun socio fundamental que foi o talento da UVigo”, engadiu.