O alcalde de Vigo, Abel Caballero, celebrou este mércores que, coa publicación no BOE da apertura do prazo de información pública do novo trazado en túnel da A-52 entre Vigo e O Porriño, esta obra está “absoluta e irreversiblemente en marcha” e esixiu a quen afirmaron que a obra non se fará “que se desculpen”.
Nunhas declaracións gravadas e remitidas aos medios, o rexedor olívico sinalou que este é “un paso importantísimo” para a construción dese novo tramo de autovía, e destacou que, na súa tramitación ambiental, adoptaranse medidas para a protección da contorna do río Eifonso, a petición do Concello de Vigo.
“O Ministerio (de Transportes) e o Concello cumprimos, dixemos que o trazado se sometería a información pública neste segundo semestre e hoxe abriuse a información pública”, proclamou Abel Caballero, que tamén destacou que o documento inclúe tamén o proxecto construtivo.
Así, unha vez finalizado o prazo de información pública e o estudo de alegacións, iniciaranse as obras dunha infraestrutura que, en materia de estradas e segundo o alcalde, é a actuación “á que o Ministerio dá máis importancia de toda España”.
Finalmente, destacou que esta actuación é “unha gran demanda” da cidade olívica e repetiu que Alberto Núñez Feijóo, sendo presidente da Xunta, “díxolle á entón ministra, Raquel Sánchez, que non a fixese, que non se necesitaba”.
